मधेश प्रदेशमा प्रतिनिधिसभा सदस्य पदका लागि उम्मेदवारी दिएका मध्ये ८९४ जनाको जमानत जफत भएको निर्वाचन आयोगले जनाएको छ ।
३२ वटा निर्वाचन क्षेत्रमध्ये मधेश प्रदेशको ३१ वटा निर्वाचन क्षेत्रको मत परिणाम अनुसार ९१ जनाले मात्रै आफ्नो जमानत जोगाउन सकेका छन् । धनुषा निर्वाचन क्षेत्र नम्बर १ मा राष्ट्रिय स्वतन्त्र पार्टी(रास्वपा)का उम्मेदवार किशोरी साह कमल कर्जा सूचना केन्द्रको कालोसूचीमा रहेको कारण देखाउँदै आयोगले उम्मेदवारी खारेजी गरेको थियो ।
तर देशैभरि रास्वपाको लहर देखेपछि आयोगले धनुषा– १ मा निर्वाचित भएका उम्मेदवारलाई निर्वाचित भएको प्रमाणपत्र दिएता पनि मतपरणामलाई विवादित रहेको भन्न थालेको छ । जसले गर्दा आधिकारिक रुपमा मतपरिणाम सार्वजनिक गरिएको छैन । आयोगले यस क्षेत्रमा नेपाली कम्युनिष्ट पार्टी(नेकपा) का उम्मेदवार मातृका प्रसाद यादवलाई निर्वाचित भएको प्रमाणपत्र दिइसकेको छ ।
धनुषा– १ बाहेक मधेश प्रदेशको ३१ वटा निर्वाचन क्षेत्रमा ९८५ जना उम्मेदवार रहेकोमा ८९४ जनाले आ– आफ्नो क्षेत्रमा कुल सदर मतको १० प्रतिशत मतसमेत पाउन सकेका छैनन् । सप्तरीको चार वटै निर्वाचन क्षेत्रमा १०२ जना उम्मेदवारमध्ये ९० जनाको जमानत जफत भएको छ । यहाँ १२ जनाले आफ्नो जमानत जोगाउन सफल भएका छन् ।
सिरहाको चार वटै निर्वाचन क्षेत्रमा १३८ जना उम्मेदवारमध्ये १२७ जनाको जमानत जफत भएको छ । सिरहामा ११ जना आफ्नो जमानत बचाउन सफल भएका छन् । धनुषाको ३ निर्वाचन क्षेत्रमा ११६ जना उम्मेदवार रहेकोमा १०६ जनाको जमानत जफत भएको छ । यहाँ १० जना उम्मेदवारले आफ्नो जमानत बँचाउन सकेका छन् ।
महोत्तरीको चारवटै निर्वाचन क्षेत्रमा १३९ जना उम्मेदवारमध्ये १२७ जनाको जमानत जफत भएको छ भने १२ जनाले आफ्नो जमानत जोगाउन सफल भएका छन् । त्यस्तै सिरहामा १३८ जना उम्मेदवारमध्ये १२७ जनाको जमानत जोगिएको छ । ११ जनाले आफ्नो जमानत जोगाएका छन् । सर्लाहीमा १३१ जना उम्मेदवार रहेकोमा १२२ जनाको जमानत जफत भए छ भने ९ जना उम्मेदवारले आफ्नो जमानत जोगाउन सकेका छन् ।
त्यस्तै रौतहटमा १४२ जना उम्मेदवारमध्ये १२८ जना उम्मेदवारले जमानत जोगाउन सकेका छैनन् । यहाँ १४ जना उम्मेदवारले मात्रै आफ्नो जमानत बचाएका छन् । त्यस्तै बारामा ११० जना उम्मेदवारमध्ये ९९ जनाको जमानत जफत भयो भने ११ जना उम्मेदवारले जोगाउन सकेका छन् । पर्सामा १०७ जना उम्मेदवारमध्ये ९५ जनाको जमानत जफत भएको छ भने १२ जना जोगाउन सकेका छन् ।
सप्तरी निर्वाचन क्षेत्र नम्बर १ मा रास्वपाकी पुष्पा कुमारी चौधरी निर्वाचित हुँदा स्वाभिमान पार्टीका सुमित कुमार र नेकपा एमालेका सुमन राज प्याकुरेल गरी ३ जनाले आफ्नो जमानत जोगाउन सकेका छन् । सप्तरी– २ मा ३ जना उम्मेदवारले आफ्नो जमानत जोगाउन सकेका छन् । यहाँ रास्वपाका रामजी यादव निर्वाचित हुँदा जनता समाजवादी पार्टी (जसपा) नेपालका उमेश कुमार यादव र जनमत पार्टीका अध्यक्ष डा. सीके राउतले आफ्नो जमानत जोगाएका छन् ।
सप्तरी– ३ मा ३ जनाले आफ्नो जमानत जोगाउन सकेका छन् भने रास्वपाका अमरकान्त चौधरी निर्वाचित भएका छन् । त्यस्तै जसपा नेपालका उपेन्द्र यादव र नेपाली कांग्रेसका दिनेशकुमार यादवले आफ्नो जमानत जोगाउन सकेका छैनन् । सप्तरी– ४ मा समेत ३ जनाले आफ्नो जमानत जोगाउन सकेका छन् । जसमा रास्वपाका सिताराम साह निर्वाचित भएका छन् भने कांग्रेसका तेजु लाल चौधरी र जसपा नेपालकी बाँवी सिंहले आफ्नो जमानत जोगाएकी छन् ।
सिरहा– १ मा ३ जनाले आफ्नो जमानत जोगाएका छन् । रास्वपाका बब्लु गुप्ता निर्वाचित हुँदा कांग्रेसका रामसुन्दर चौधरी र नेकपा एमालेका रामशंकर यादवले जमानत जोगाएका छन् ।
निर्वाचन आयोगको मत परिणाम अनुसार मधेश प्रदेशको ३१ वटा निर्वाचन क्षेत्रको मत परिणाम अनुसार राष्ट्रिय स्वतन्त्र पार्टी (रास्वपा) का सबै उम्मेदवारले मात्र जमानत जोगाउन सफल भएका छन् । रास्वपाका ३१ उम्मेदवारमध्ये ३० जना निर्वाचित भएका छन् भने कांग्रेसले एउटा क्षेत्रमा आफ्नो साख जोगाएका छन् ।
त्यस्तै धनुषा– १ मा फागुन २९ गते सर्वोच्च अदालतले टुंगो लगाउने छ । तर अहिले भने सो क्षेत्रमा नेकपाले निर्वाचित भएको प्रमाणपत्र प्राप्त गरिसकेको छ । त्यस्तै, नेपाली कांग्रसका ३१ ज्ना उम्मेदवारमध्ये २२ जना उम्मेदवारले आफ्नो जमानत जोगाउन सकेका छन् ।
कांग्रेसका एक उम्मेदवार निर्वाचित भएका छन् । त्यस्तै, नेकपा एमालेका १६ जना, जसपा नेपालका ९ जना, नेकपाका ९ जना, आजपा, जनमत पार्टी, नेपाल संघीय समाजवादी पार्टी र स्वाभिमान पार्टीका १/१ जना उम्मेदवारले आफ्नो जमानत जोगाउन सकेका छन् ।
