वर्षाका कारण अवरुद्ध मानसरोवर कैलाश जाने सडक आजदेखि सञ्चालनमा

धर्म /संस्कृति

गृहपृष्ठ
धर्म /संस्कृति

वर्षाका कारण अवरुद्ध मानसरोवर कैलाश जाने सडक आजदेखि सञ्चालनमा

Parsa Online सोमबार, भदौ १०, २०८१

वर्षाका कारण मानसरोवर कैलाश जाने चीनतर्फको भू–भागमा शुक्रवार रातिदेखि अवरुद्ध सडक आजदेखि सञ्चालनमा आएको छ । केरुङ खोलाले कटान गरेको सडक चिनियाँ पक्षले पुनः निर्माण गरेपछि आज दिउँसाेदेखि मानसरोवर कैलाश जाने दर्शनार्थीहरूको आवतजावत खुला भएको सीमा सुरक्षा अधिकारीले जनाएका छन् ।

प्रमुख जिल्ला अधिकारी वेदनिधि खनालकानुसार रसुवागढीको मितेरी पुलबाट पाँच किलोमिटर उत्तर चिनियाँ भू–भागअन्तर्गत केरुङ खोलामा आएको बाढीले राजमार्ग कटान गरेपछि रोकिएका सबै यात्रु मितेरी पुलबाट आउजाउ गर्न थालेका छन् ।

सडक अवरुद्ध हुँदा कैलाशबाट नेपाल फर्किन लागेका झन्डै पाँच सय जना यात्रु केरुङमा र तीर्थ जाँदै गरेका एक सय जना यात्रु रसुवागढीमा रोकिएका थिए । रोकिएका यात्रु अध्यागमनको प्रक्रिया पुर्‍याई गन्तव्यतर्फ जान थालेका खनालले जानकारी दिए।

रोकिएका यात्रुलाई गन्तव्यमा जान नेपाल प्रहरी र सशस्त्र प्रहरी बल २० नम्बर गुल्म रसुवाले समन्वय गरेकाे छ ।

प्रकाशित मिति: सोमबार, भदौ १०, २०८१

प्रतिक्रिया दिनुहोस्