गुल्सन झालाई किन्न सात टोलीको तानातान, गोलाप्रथाबाट कर्णालीले पायो

खेलकुद

गृहपृष्ठ
खेलकुद

गुल्सन झालाई किन्न सात टोलीको तानातान, गोलाप्रथाबाट कर्णालीले पायो

Parsa Online सोमबार, असोज २१, २०८१

सात टोलीले आँखा लगाएका राष्ट्रिय क्रिकेट टोलीका अलराउण्डर गुल्सनकुमार झालाई गोला प्रथाबाट कर्णाली याक्सले पाएको छ । काठमाडौंमा जारी अक्सनमा गुल्सन किन्न लुम्बिनीले भने पाएन । उसले यसअघि नै तीन श्रेणी ‘ए’ का खेलाडी किनिसकेको थियो । सात टोलीले उच्चतम १५ लाख खर्च गर्दा कर्णाली याक्स भाग्यमानी बन्यो । नेपाल क्रिकेट संघ (क्यान) ले काठमाडौंमा आयोजना गरेको अक्सनबाट सहभागी आठ टिमले समान १० जना खेलाडी खरिद गर्दैछन् । अक्सनको सर्ट लिष्टमा कूल १४२ खेलाडी छन् ।

१५ मंसिरदेखि ६ पुससम्म काठमाडौंमा हुने लिगमा एक टोलीमा १६ खेलाडी रहँदा एक मार्की, चार विदेशी र एक ट्यालेन्ट हन्टबाट टिममा अनुबन्ध हुनेछन् । कुशल भुर्तेल पोखरा एभेन्जर्स, करण केसी काठमाडौं गुर्खाज, कुशल मल्ल चितवन राइनोज, रोहित पौडेल लुम्बिनी लायन्स, सन्दीप लामिछाने विराटनगर किंग्स, आसिफ सेख जनकपुर रोयल्स, सोमपाल कामी कर्णाली याक्स र दीपेन्द्रसिंह ऐरी सुदूरपश्चिम रोयल्सका मार्की खेलाडी हुन् । क्यानले यसअघि नै मार्की खेलाडीले २० लाख पाउने बताएको छ ।

एक टिमले १० खेलाडीका लागि बढीमा ९० लाख खर्च गर्न पाउने छन् । नियमानुसार श्रेणी ‘ए’ को २७ जना खेलाडीको न्यूनतम मूल्य १० लाख र उच्चतम १५ लाख रुपैयाँ हुनेछ । यदि उच्चतम मूल्यमा एकभन्दा बढी टिमले दाबी गरेमा गोलाप्रथाबाट खेलाडी कुन टोली जाने निर्धारण हुनेछ । ‘बी’ श्रेणीमा रहेका ३८ जना खेलाडीको न्यूनतम मूल्य पाँच लाख र उच्चतम मूल्य १० लाख छ । ७७ जना खेलाडी रहेको ‘सी’ श्रेणी खेलाडीको न्यूनतम दुई लाख र उच्चतम मूल्य पाँच लाख राखिएको छ । यता, विदेशी खेलाडी भने क्लबहरूले आन्तरिक सहमतिमै सम्झौता गर्न सक्छन् ।

प्रकाशित मिति: सोमबार, असोज २१, २०८१

प्रतिक्रिया दिनुहोस्