मधानी महोत्सवको अवसरमा पतौराधाममा अन्तर्राष्ट्रिय दंगल सम्पन्न

खेलकुद

गृहपृष्ठ
खेलकुद

मधानी महोत्सवको अवसरमा पतौराधाममा अन्तर्राष्ट्रिय दंगल सम्पन्न

नबीन कार्की बिहीबार, फागुन १५, २०८१

रौतहटको मौलापुर नगरपालिका स्थित पतौराधाममा आयोजित मधानी महायज्ञको अन्तिम दिन अन्तर्राष्ट्रिय दंगल (कुस्ती) कार्यक्रमसहित महायज्ञको समापन भएको छ। नेपाल र भारतका चर्चित पुरुष तथा महिला पहलवानहरुको विशेष सहभागितामा सम्पन्न दंगल कार्यक्रमले हजारौं दर्शकलाई आकर्षित गरेको थियो।

मौलापुर नगरपालिकाका उपमेयर नागेन्द्र यादवको अध्यक्षता र मेयर रिनाकुमारी साहको प्रमुख आतिथ्यतामा सम्पन्न उक्त दंगल कार्यक्रमले धार्मिक, सांस्कृतिक, पर्यटकीय एवं ऐतिहासिक दृष्टिले महत्वपूर्ण पतौराधामको प्रचार-प्रसारमा योगदान पुर्‍याएको आयोजकले बताएका छन्।

पाँच दिनसम्म चलेको मधानी महायज्ञ अन्तर्गत विभिन्न कार्यक्रम सम्पन्न भएका थिए। ११ फागुनमा विभिन्न विद्यालयका विद्यार्थीहरूले शिक्षा तथा साक्षरता केन्द्रित सांस्कृतिक कार्यक्रम प्रस्तुत गरेका थिए। १२ फागुनमा भगवान शिवको बारात यात्रा आयोजना गरिएको थियो भने १३ फागुनमा शिव मन्दिरमा विशेष पूजा तथा शिवमण्डलीबीच प्रतिस्पर्धा सम्पन्न भएको थियो।

त्यसैगरी, १४ फागुनमा मधानी विशेष सांस्कृतिक कार्यक्रम आयोजना गरिएको थियो, जसमा नेपाल र भारतका चर्चित कलाकारहरूले आफ्नो प्रस्तुति दिएका थिए। अन्ततः १५ फागुनमा मधानी विशेष दंगल कार्यक्रम सम्पन्न गर्दै महायज्ञको औपचारिक समापन गरिएको हो।

मौलापुर नगरपालिका पतौराधामस्थित महादेव मन्दिरलाई विश्व सम्पदा सूचीमा सूचिकृत गराउने संकल्पसहित आयोजना गरिएको यस महायज्ञले धार्मिक पर्यटन प्रवर्द्धनमा महत्त्वपूर्ण योगदान दिने विश्वास गरिएको छ।