वीरगंज । नेपाली कांग्रेस पर्सा क्षेत्र नं. ४ को प्रतिनिधिसभा निर्वाचन २०८२ सम्बन्धी समीक्षा बैठक शनिबार सम्पन्न भएको छ। जगरनाथपुर गाउँपालिकाकाे वडा नं.–५ मसिहानी धर्मपुरमा सम्पन्न बैठकमा बोल्दै पूर्वमन्त्री तथा उक्त निर्वाचनका उम्मेदवार रमेश रिजालले अब आफूले कुनै पनि चुनाव नलड्ने घोषणा गर्नुभएको छ।
उहाँले निर्वाचनकै समयमा गरेको प्रतिबद्धताअनुसार आगामी दिनमा कुनै पनि निर्वाचनमा उम्मेदवारी नदिने बताउनुभयो। फागुन २१ गते सम्पन्न प्रतिनिधिसभा निर्वाचनमा पर्सा क्षेत्र नम्बर ४ मा कांग्रेसले व्यहोरेको पराजयबारे आयोजित क्षेत्रीय अगुवा कार्यकर्ता भेलामा बोल्दै रिजालले अब आफू संसदीय निर्वाचनमा प्रतिस्पर्धा नगर्ने स्पष्ट पार्नुभयो।
“आजै म घोषणा गर्छु, अब म चुनाव लड्दिनँ । युवा पुस्तालाई साथ र समर्थन रहनेछ,” उहाँले भन्नुभयो, “चुनाव नलडे पनि यस क्षेत्रका जनताको सेवामा भने म सधैं सक्रिय रहनेछु ।” पर्सा क्षेत्र नम्बर ४ को विकास र समृद्धिका साथै यहाँका जनताका समस्याको समाधानका लागि आफूले सक्दो प्रयास जारी राख्ने प्रतिबद्धता पनि उहाँले व्यक्त गर्नुभयो।
फरक प्रसंगमा पूर्वमन्त्री रिजालले फागुन २१ को निर्वाचनमा आफू र कांग्रेसलाई मत दिने मतदाताप्रति आभार व्यक्त गर्नुभयो। परिवर्तनको लहरमा अन्य दल वा उम्मेदवारलाई मत दिएका कांग्रेसका कार्यकर्ता तथा समर्थकप्रति आफ्नो कुनै गुनासो नरहेको बताउँदै उहाँले पुनः आफ्नै पार्टी कांग्रेसमा फर्किन आग्रह गर्नुभयो।
“जनता जनार्दन भएकाले जनमतको सम्मान गर्नुपर्छ,” उहाँले भन्नुभयो, “जनताको दुःख–सुखमा उभिने पार्टी भनेकै कांग्रेस हो, त्यसैले कांग्रेसलाई भरोसा गरेर घर फर्किन आग्रह गर्छु।”
कांग्रेस क्षेत्रीय सभापति श्रीकान्त प्रसाद यादवको अध्यक्षतामा भएको उक्त भेलामा मधेस प्रदेश सरकारका वनमन्त्री शंकर चौधरी, कांग्रेसका मधेस प्रदेश महामन्त्री बृहस्पतिकृष्ण श्रेष्ठ, कांग्रेस पर्साका प्रवक्ता रमेश पाण्डेय, जिल्ला सह सचिव नविन सिंह, नेता बशिष्ठ नारायण कुर्मी, क्षेत्रीय सचिव बलिष्टर अहमद लगायतकाको सहभागिता थियो ।
क्षेत्रीय कार्यसमितिले आयोजना गरेको समीक्षा बैठकमा क्षेत्रीय कार्यसमितिका पदाधिकारी तथा सदस्य, महाधिवेशन प्रतिनिधि, महासमिति सदस्य, जिल्ला कार्यसमिति पदाधिकारी तथा सदस्य, प्रदेश कार्यसमिति पदाधिकारी तथा सदस्य, गाउँपालिका कार्यसमिति, बुथ सभापति, वडा सभापति, निर्वाचित गाउँपालिका अध्यक्ष, उपाध्यक्ष, वडा अध्यक्ष तथा सदस्यहरू, नेपाली कांग्रेसका शुभेच्छुक तथा भ्रातृ संगठनका प्रतिनिधि र अगुवा कार्यकर्ताहरूको उल्लेख्य उपस्थिति रहेको थियो।
भेलामा पर्सा क्षेत्र नम्बर ४ मा कांग्रेसले व्यहोरेको हारका कारणबारे गम्भीर समीक्षा समेत गरिएको थियो।
