दिल्लीमा ठूलो दुर्घटना टर्‍यो : एयर इन्डियाको विमानको इन्जिनमा आगलागी, १६० यात्रु सकुशल

अन्तर्राष्ट्रिय

गृहपृष्ठ
अन्तर्राष्ट्रिय

दिल्लीमा ठूलो दुर्घटना टर्‍यो : एयर इन्डियाको विमानको इन्जिनमा आगलागी, १६० यात्रु सकुशल

Parsa Online शुक्रबार, जेठ ८, २०८३

भारतको बेंगलुरुबाट दिल्लीका लागि उडेको Air India को एक उडानको इन्जिनमा आगलागी भएपछि विमानले दिल्ली विमानस्थलमा आपतकालीन तर सुरक्षित अवतरण गरेको छ । विमानमा सवार सबै १६० यात्रु तथा चालक दलका सदस्य सकुशल रहेको जनाइएको छ । भारतीय सञ्चारमाध्यमहरूका अनुसार बिहीबार साँझ अवतरणको अन्तिम चरणमा पुगेको बेला ककपिट चालक दलले इन्जिनमा आगलागी भएको संकेत पाएको थियो ।

पछि उक्त संकेत वास्तविक आगलागी भएको पुष्टि भएको एयर इन्डियाले विज्ञप्तिमार्फत जनाएको छ । चालक दलले तत्काल सुरक्षा प्रक्रिया अपनाउँदै विमानलाई सुरक्षित रूपमा दिल्ली विमानस्थलमा अवतरण गराएको थियो । अवतरणपछि यात्रुहरूलाई सामान्य प्रक्रियाअनुसार सुरक्षित रूपमा विमानबाट बाहिर निकालिएको एयर इन्डियाले जनाएको छ ।

घटनापछि विमानस्थलमा केही समय उच्च सतर्कता अपनाइएको थियो । प्रारम्भिक जानकारीअनुसार आगलागी इन्जिनको प्राविधिक समस्याका कारण भएको आशंका गरिएको छ । एयर इन्डियाले घटनाबारे विस्तृत अनुसन्धान सुरु गरिएको जनाएको छ । विमानलाई प्राविधिक परीक्षणका लागि अलग राखिएको छ भने उडान सुरक्षासम्बन्धी निकायहरूले पनि घटनाको छानबिन थालेका छन् ।

प्रकाशित मिति: शुक्रबार, जेठ ८, २०८३

प्रतिक्रिया दिनुहोस्